La afiŝo, kiun Universala Esperanto-Asocio pretigis por la Tago de Esperanto 2023, ekzistas en dudek ok lingvoj. Unu el ili estas la valencia, kaj ĝi estis la lasta alveninta: unu monaton kaj duonon post la tago.
La afiŝo de la Tago de Esperanto 2023 en la valencia, aldonita al la kolekto de UEA la 13-an de septembro 2023.
La 22-an de julio 2023, kvar tagojn antaŭ la Tago de Esperanto, Renato Corsetti skribis al la Esperanto-Grupo de Valencio. La afiŝo-dosierujo de UEA jam havis versiojn en dekoj da lingvoj, kaj mankis unu:
Inter ili mankas la valencia versio, sed se vi tuj sendas al mi la tradukon de ĉiuj vortoj en la afiŝo en la valencia, mi provos peti ke oni pretigu ĝin por vi antaŭ la 26-a.
La grupo plusendis ĝin al sia listo la 24-an. La traduko eliris la 26-an —la tagon mem— kaj la valencia afiŝo aldoniĝis al la kolekto la 13-an de septembro. La aliaj dudek sep lingvoj ĉiuj ĉeestis antaŭ la tago: la antaŭa, la urdua, envenis la 18-an de julio.
Kion ĝi diras, kaj kion ĝi devus diri
La valencia teksto estas:
Dia del Esperanto · 26 juliol 2023 · La llengua internacional que treballa per la pau, l’evolució sostenible i el diàleg mondial
Ĝi portas du hispanismojn kaj unu paŭsaĵon. «Dia del Esperanto» devus esti «Dia de l’Esperanto». «Diàleg mondial» devus esti «diàleg mundial»: mondial venas de la Esperanta monda, kaj la hispana afiŝo ĝuste diras «mundial».
La tria, male, ne estas nia. La Esperanta originalo diras daŭripova evoluigo; la hispana afiŝo tradukis tion per «evolución sostenible» —kiu ne signifas la samon— kaj la valencia versio sekvis ĝin. Oni ja rimarkas, ke la traduko estis farita el la hispana kaj ne el Esperanto.
La dosiero plu estas rete havebla tia, kia ĝi estas.
Afiŝo retrospektive aldonita la 26-an de aŭgusto 2026. La dato de la afiŝo respondas al la originala dokumento aŭ agado.
Legi en:
